راس مال بشري
لما بنيجي نشتري عقار او بيت بنسأل ونتقصى عن المطور الي هينفذ المشروع اليّ بنفكر نستثمر فيه، قبل ما بنروح له بنتحقق من سابقة اعماله ومشاريعه من حيث الالتزام بما وعد او بما تم الاتفاق عليه ، بنشوف التزامه بالمواعيد وبالمساحات والخدمات واراء العملاء الحاليين فيه ، نهتم جداً بما شرط علي نفسه في التعاقد وبنفصص العقد حتة حتة وممكن كمان ناخد رأي قانوني فيه ، قبل ما نرسى على مطور دون الأخر بنمشي طريق طويل فيه مسح وكسح للسوق العقاري اكننا معانا ملايين الجنيهات وعادة مبيكونش كدة بس بالنسبة لنا بنحط تحويشتنا في العقار دة ، بعد ما بنفند ونحقق ونمقق ونشوف كل المشاريع والمطورين الموجودين ونحدد واحد او اتنين بنعمل ما يسمى ب deep dive ونتحول ل researchers ونغطس جوا كل التفاصيل لهذا المطور او ذاك. منى رضوان تكتب : عقار يامصر
بنبص علي انجزاته و خدمة ما بعد البيع عنده ولو نعرف اي احد اتعامل معاه بنسأله بشكل شخصي عن تجربته وهل يرشح لنا ان نتعامل مع المطور دة ولا لأ،ممكن ناخد في مرحلة التقصي دي شهور ان لم يكن سنوات لاننا بنستثمر استثمار هيمتد لاولادنا و بنتجوز جواز ارثوذوكسي مع شريك هيكون الخلاص منه في حاله عدم نجاحه مهمة اكثر مشقة من مهمة التعاقد معاه.
في ناس بعد شهور او سنوات من البحث مبترتاحش لحد فمبتستثمرش اصلا وتأجل الفكرة جزئياً او كلياً.
وفي اخرين مش شرط يروحوا لحد معروف واسمه زي الطبل وممكن يستثمروا مع حد جديد لو توافر فيه مقومات النجاح المدعمة ببرنامج زمني و خطوات محددة و طبعا لو حسوا بالرضا عن المشروع او المبني اليّ شايفينه على الورق او شايفين اساساته .
هل كل العناء والتعب السابق دة علشان شوية طوب وزلط وكتل اسمنتية؟ يعني لو الواحد بيدور علي استثمار ذو ربحية عالية يروح يحط فلوسه في بنك ولا يشتري دهب او مرجان او ياقوت ويبقى زي على بابا.
الحقيقة ان الناس تستثمر في العقار لأنه بشكل مباشر يمثل استثمار لنفسه وولاده.
العقار على الورق متوصف بأرقام ومساحات واحدثيات وبنود تعاقد ومبلغ تعاقد وشروط جزائية وخطة دفع وطرف اول وطرف تاني.
لكن في الحقيقة هو استثمار في اهم حاجة في الدنيا الا وهي ما يسمى بال human capital او الرأس مال البشري.
ال human capital دة هو اليّ بيخلينا نفكر واحنا بنشترى المكان دة مستقبله ايه ؟ خطته العمرانية متكاملة ولا لأ ؟ خدماته شغالة ؟ طبيعة الاراضي اليّ حواليه ايه ؟ هل له مراحل جديدة ولا هو كدة دلوقتي ومفيش اي extensions له.
لو بصينا للموضوع كفلوس وخلاص يبقى احنا بنتكلم عن رأس مال نقدي، ودة يختلف عن الرأس المال البشري جملة وتفصيلاً بسبب الخاصية غير العادية لرأس المال البشري الذي بينمو بشكل تراكمي على مدى فترة طويلة من الزمن ولذلك هو استثمار طويل المدى لأجيال واجيال.
كل التساؤلات والدراسات والشقلبظات السابقة دي اعمق بكتير من انها علشان عايزين نتأكد ان قرارنا واستثمارنا صح وفي محله مع المطور هذا او ذاك – على العكس احنا بنسأل لنفسنا وبنعمل كل المجهود دة لأننا نستثمر لاغلى ما نملك ودة هو انفسنا واولادنا واسرتنا الممتدة.
القصة مش قصة اسمنت وحجارة وشقة ولا ڤيلا ولا عمارة…الفكرة في الناس اليّ هيملوها حياة ودول هم الأستثمار الكسبان.
